હું તો પૂછું

હું તો પૂછું કે મોરલાની પીંછીમાં

           રગ-રંગવાળી

આ ટીલડી કોણે જડી ?

   વળી પૂછું કે મીંદડીની

            માંજરી-શી આંખમાં

ચકચકતી કીકીઓ કોણે મઢી ?

  હું તો પૂછું કે આંબલાની ટોચે

       જ્યાં હાથ ના પહોંચે

         ત્યાં કૂંપળો કોણે કરી ?

વળી પૂછું કે ગાવડીના પેટે

         આ દૂધની

ધોળી મીઠી ધાર કોણે ભરી ?

          હું તો પૂછું કે ચાંદાની થાળીમાં

બકરી ને ડોશીની

         ઝૂંપડી કોણે મઢી ?

વળી પૂછું કે આભની હથેળીમાં

         સૂરજની ભમતી

            ભમરડી કોણે કરી ?

હું તો પૂછું કે પોપચે મઢેલી આ

  દસ દિશ દેખંતી

             આંખ મારી કોણે કરી ?

વળી પૂછું કે નવલખ તારે

           મઢેલી આ

           આભલાની ચૂંદડી કોણે કરી ?

                                  -સુંદરમ્