પગલાં

પગલાં

દરિયાને તીર એક રેતીની ઓટલી

ઊંચી અટૂલી અમે બાંધી જી રે,

પગલું તે એક પાડે મહેમાન એમ

રામજીની આણ અમે દીધી જી રે,

પહેલા મહેમાન તમે આવો,સૂરજદેવ,

પગલું સોનાનું એક પાડો જી રે,

પગલામાં નવલખ તારાની ભાત ને

સંધ્યાના રંગ બે’ક માંડજો જી રે,

બીજા મહેમાન તમે આવો,પવનદેવ,

પગલું ઊડેરોં એક પાડજો જી રે,

પગલામાં વાત લખો પરીઓના દેશની

ફૂલડાંની ફોરમ પૂરજો જી રે,

ત્રીજા મહેમાન તમે આવો,સમદરદેવ,

પગલું મોતીનું એક પાડજો જી રે.

પગલામાં મહેલ ચણી સાતે પાતાળનાં,

માણેકના દીવા પ્રગટાવજો જી રે,

ધીરે મહેમાન જરા ધીરેથી આવજો,

પગલાં તે પાડજો જાળવી જી રે,

જો જો વિલાય ના એ પગલાની પાંદડી,

બાળુડે ઓટલી બનાવી જી રે.

                                                   -સુંદરમ્