સુખ દુ:ખ મનમાં ન આણીએ

સુખ દુ:ખ  મનમાં ન આણીએ,ઘટ સાથે રે ઘડિયાં;

ટાળ્યાં તે કોઇનાં નવ ટળે,રઘુનાથનાં જડિયાં.સુખ..

નળરાજા સરખો નર નહિ,જેની દમયંતી રાણી;

અર્ધે વસ્ત્રે વનમાં ભમ્યાં,ન મળે અન્ન ને પાણી. સુખ..

પાંચ પાંડવ સરખાં બંધવા,જેને દ્રોપદી રાણી;

બાર બાર વરસ વન ભોગવ્યાં,નયણે નિદ્રા ન આણી.સુખ..

સીતા સરખી સતી કહિ,જેના રામજી સ્વામી;

રાવણ તેને હરી ગયો,સતી મહાદુ:ખ પામી.સુખ..

રાવણ સરખો રાજિયો,જેની મંદોદરી રાણી;

દશ મસ્તક છેદાઇ ગયાં,બધી લંકા લૂટાણી.સુખ..

હરિશ્ચંદ્ર રાય સતવાદિયો,તારાલોચની રાણી;

તેને વિપત્તિ બહુ પડી ભર્યા નીચ ઘેર પાણી.સુખ..

એ વિચારી હરિને ભજો,તે સા’ય જ કરશે;

જુઓ આગે સા’ય ઘણી કરી,તેથી અર્થ જ સરશે.સુખ..

સર્વે કોઇને જ્યારે ભીડ પડી,સમર્યા અંતરજામી;

ભાવટ ભાગી ભૂધરે,મહેતા નરસૈંયને સ્વામી.સુખ..

 -નરસિંહ મહેતા