બાલવિમાની

બાલવિમાની

સ્વતંત્ર ભારતવર્ષતણો હું બનીશ બાલ-વિમાની;

નાનકડા હૈંયામાં મારા હોંસ નથી કંઇ નાની.

ગરૂડ સમાણું વિમાન મારૂ સરસર ઊંચે ચઢશે;

વીજ વિલસતાં વાદળ વીંધી આકાશે જઇ અડશે.

ચક્કર પર ચક્કરલેતું એ માપ ધરાનું લેશે;

સાતે સાગર ઉપર થઇ ને ઘૂમશે દેશે દેશે.

આકાશે ને નીચે એનું બિંબ અજબ કંઇ શોંશે;

ઊંચા પર્વત સ્તબ્ધ બનીને શોભા એની જોશે.

દશે દિશાએ ભરતખંડની ધજા ફરકતી જાશે;

ગરવાં ગીતો ‘જય ભારત’નાં પૃથ્વી પર પડઘાશે.

વિમાન મારૂ જ્યાં જ્યાં જાશે ત્યાં ‘જય હિંદ’ગવાશે;

પ્રેમભરી પ્રભુતા ભારતની શુભ સર્વત્ર છવાશે.

સ્વતંત્ર ભારતવર્ષતણો હું બનીશ બાલ-વિમાની;

ભારતની સેવામાં મારી હો જીવન-કુરબાની.

                                           - પૂજાલાલ